衣物收納法 | 相信大家最近都已經感受到夏天炎熱嘅天氣，就連夜晚訓覺都會開風扇或者冷氣，仲未收好冬天衣物嘅大家，就必定要學以下5大轉季收納法！
圖片來源：Freepik、Twitter@MPD_bousai、Instagram@mariekondo | 撰文：Hedy
衣物收納法 | 1. 不換季衣櫃整理法
呢一個收納方法最適合懶人，唔需要每次轉季再重新執過一次啲衫。日本收納整理師須藤昌子就分享咗一個「不換季」衣櫃整理法，只需要將當季嘅衫掛喺中間，再將非當季嘅衣服擺喺左右兩邊，咁就好容易攞到當季嘅衫嚟著！當換季嘅時候就可以再將左右兩側嘅衫再放翻中間，相當方便！呢個收納法更可以令大家喺天氣轉換嘅時候，即刻攞外套著，咁就唔洗再喺衣櫃左搵右搵！
當大家覺得自己嘅衫多到放唔落嘅時候，須藤昌子亦都提醒大家一定要掉走呢3種衫，當中包括好耐冇著、重複款式以及好睇唔好著嘅衫。如果屋企空間有限嘅話，大家都可以善用收納箱，同樣都係將當季衫放喺最容易攞到嘅地方，非當季就放喺兩邊，換季只需要搬動收納箱就搞掂。
「不換季」衣櫃整理法超方便！（圖片來源：Freepik）
衣物收納法 | 2.「怦然心動」收納法
相信大家都一定聽過斷捨離嘅方法，而日本專業整理師近藤麻理惠提出嘅「怦然心動」收納法，就同斷捨離有少少分別，反而係選擇留低令自己心動嘅衣物。當將衣服攞上手嘅時候，如果件衫仲會令你「怦然心動」，就可以留低，但如果唔可以就應該好好咁同衣物講再見並心存感謝。
「怦然心動人生整理魔法」作者近藤麻理惠（圖片來源：Instagram@mariekondo）
直立衣物，有助增加收納空間（圖片來源：Instagram@mariekondo）
同時大家喺整理衣物嘅時候，更可以學習近藤麻理惠嘅摺法，咁就可以令衣櫃變得相當整齊！將衣物平放之後，就可以再摺成長方形，再繼續摺成迷你正方形，令衣物可以直立，有助增加收納空間！
衣物收納法 | 3. T恤收納大法
無論喺去旅行定係準備執衣櫃嘅大家，可能會望住一堆衫無從入手？如果平時都係將衫亂摺亂擺嘅朋友，就一定要學學由日本警視廳災難教大家嘅T恤收納大法。只要將T恤放平之後，就可以由底部向上摺大概10cm，將左邊衣服往內摺，將袖子摺向另一邊，左右同樣都係咁嘅做法。之後就可以將衣領向翻自己，由領口位開始將衫捲起，最後就用本身T恤底部所摺嘅位置包起件衫～方便擺放之餘又可以隨時攞起衣物，超方便，收納空間大增50%！
必學T恤收納大法（圖片來源：Twitter@MPD_bousai）
呢個摺法超方便！（圖片來源：Twitter@MPD_bousai）
衣物收納法 | 4. 衣櫃分區法
每次出門口嘅時候，都要將衣櫃整亂先搵到衫？大家都可以善用衣櫃分區法，將衣櫃分成頂部、中間以及底部，可以因應季節將較少用嘅衣物放喺頂部，中間就擺放一啲經常會穿著嘅衫，而底部就可以擺放唔常用嘅衣物甚或係配件類等等。當搵衫嘅時候，就自然會喺中間嘅區域搵，咁就唔會整亂成個衣櫃～
將常著嘅衫擺中間（圖片來源：Freepik）
衣物收納法 | 5. 333法則
當屋企嘅衫已經近乎擺滿嘅情況下，相當推薦大家可以參考日本收納整理專家須原浩子所提出嘅「333法則」，幫助大家斷捨離物品。首先第一個3，係指3秒入面決定一件物件嘅去留，當超過3秒都未落決定，就代表呢個物品對自己嚟講未必太重要。第二個3就係指3年以上冇用過嘅物品，就可以直接掉走！當大家對去留物品嘅時候，經常提出唔同嘅藉口例如可能會著到以及擺住先等等，就符合最後一個3，3個猶豫不決嘅藉口！「333法則」絕對可以幫大家清理走衣物，節省收納空間！
善用333法則，斷捨離衣物！（圖片來源：Freepik）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
Tags :
家居收納法日本衣季收納法換季衣物收納衣物收納法衣物整理sauce生活sauce焦點
HedyCheng
04/10/2024